ભાજપના જિલ્લા પંચાયત સીટના ઉમેદવાર કંચનબેન વિજયકુમાર અને તાલુકા પંચાયત સીટ ઉપર સંગીતાબેન અરવિંદભાઈ ની ભવ્ય જીત

કાંસા સરપંચ ક્રિષ્ણાબેન અને પૂર્વ સરપંચ ભરતભાઈ પટેલ (ગામી) ની મહેનત રંગ લાવી

વિસનગર તાલુકામાં સ્થાનિક સ્વરાજ્યની ચૂંટણીમાં ભાજપે એકતરફી જીત નોંધાવી છે. કાંસા જિલ્લા પંચાયત અને તાલુકા પંચાયત બંને સીટ ઉપર ભાજપના ઉમેદવારોની ભવ્ય જીત સાથે સમગ્ર વિસ્તારમાં “ભગવો લહેરાયો” છે. આજે જાહેર થયેલા પરિણામોમાં ભાજપે પ્રભુત્વ જમાવતાં વિરોધ પક્ષોને મોટો ઝટકો લાગ્યો છે.

કાંસા જિલ્લા પંચાયત સીટ ઉપર ભાજપના ઉમેદવાર કંચનબેન વિજયકુમારે 3726 વોટની બહુમતી સાથે વિજય મેળવ્યો છે. પ્રાથમિક ગણતરીથી લઈને અંતિમ પરિણામ સુધી તેઓ સતત આગળ રહ્યા હતા. કંચનબેન કુલ 10843 મત મળ્યા હતા જયારે કોંગ્રેસના ઉમેદવાર ચેતનાબેન ઠાકોરને 7108 મત મળ્યા હતા. જેમાં 3726 મતની લીડ સાથે ભાજપના ઉમેદવાર કંચનબેન પટેલ વિજેતા થયા હતા.

તે જ રીતે કાંસા તાલુકા પંચાયત સીટ ઉપર ભાજપના ઉમેદવાર સંગીતાબેન અરવિંદભાઈએ ખરાખરીના જંગમાં માત્ર 51 વોટથી જીત મેળવી છે.કોંગ્રેસના ઉમેદવાર અનસુયાબેન 2187 મત મળ્યા હતા જયારે ભાજપ સંગીતાબેન પટેલને 2238 મત મળ્યા હતા જેમાં 51 મતની સરસાઈથી ભાજપે જીત મેળવી છે.

આ જીત પાછળ મંત્રીશ્રી ઋષિકેશભાઈ પટેલ અને કાર્યકરોની મહેનત મહત્વપૂર્ણ રહી છે. ખાસ કરીને કાંસા ગામના સરપંચ ક્રિષ્ણાબેન તથા પૂર્વ સરપંચ ભરતભાઈ પટેલ (ગામી)ની સંગઠનાત્મક શક્તિ અને ગ્રાઉન્ડ લેવલ પર કરેલી મહેનત રંગ લાવી છે. તેમણે ઘરેઘરે જઈને પ્રચાર કર્યો હતો અને મતદારો સાથે સીધો સંપર્ક સાધ્યો હતો, જેના કારણે ભાજપને મજબૂત સમર્થન મળ્યું. ભાજપના વિકાસલક્ષી કાર્યોને મતદારો સુધી સમજાવવામાં ભરતભાઈ ગામી સફળ રહ્યા હોય તે જીત પરથી નક્કી થાય છે.

ચૂંટણી દરમિયાન વિકાસ, માર્ગ વ્યવસ્થા, પાણી, સ્વચ્છતા અને સ્થાનિક સમસ્યાઓ જેવા મુદ્દાઓ કેન્દ્રમાં રહ્યા હતા. ભાજપના ઉમેદવારોએ આ તમામ મુદ્દાઓને લઈને સ્પષ્ટ વિઝન રજૂ કર્યું હતું, જેને મતદારોમાં સકારાત્મક પ્રતિસાદ મળ્યો. બીજી તરફ વિરોધ પક્ષો મતદારોને આકર્ષવામાં પાછળ રહ્યા હોવાનું પરિણામોથી સ્પષ્ટ થાય છે.

વિસનગર વિસ્તારમાં ભાજપની આ જીતને રાજકીય રીતે મહત્વપૂર્ણ માનવામાં આવી રહી છે, કારણ કે આ જીત ભવિષ્યની ચૂંટણી માટે પણ દિશા દર્શાવે છે. કાર્યકરોમાં ભારે ઉત્સાહ જોવા મળ્યો હતો અને જીતની ખુશીમાં વિવિધ સ્થળોએ ઉજવણી કરવામાં આવી હતી. ફટાકડા ફોડીને અને મીઠાઈ વહેંચીને આ વિજયનો આનંદ વ્યક્ત કરવામાં આવ્યો હતો.

આ રીતે કાંસા જિલ્લા પંચાયત અને તાલુકા પંચાયત બંને સીટ ઉપર ભાજપની ભવ્ય જીત સાથે વિસનગરમાં રાજકીય દ્રશ્યો બદલાયા છે.