મહેસાણા-વિસનગર રોડ પર આવેલી જાણીતી મર્ચન્ટ નર્સિંગ કોલેજની હોસ્ટેલમાં આજે એક કરુણ ઘટના બની છે. અહીં B.Sc નર્સિંગના બીજા વર્ષમાં અભ્યાસ કરતી નવસારીની એક વિદ્યાર્થિનીએ પોતાના હોસ્ટેલ રૂમમાં ગળેફાંસો ખાઈ આત્મહત્યા કરી લીધી હોવાનું સામે આવ્યું છે. આ ઘટનાએ સમગ્ર કોલેજ કેમ્પસ સાથે શિક્ષણ જગતમાં ભારે અરેરાટી ફેલાવી છે.

સફાઈ કર્મીના સાવચેતીભર્યા પગલાંથી ઘટના બહાર આવી

પ્રાપ્ત માહિતી અનુસાર, અસ્મિતા પટેલ નામની વિદ્યાર્થિની હોસ્ટેલના રૂમ નંબર A-208માં એકલી રહેતી હતી. આજે સવારે હોસ્ટેલનો સફાઈ કર્મી નિયમિત રીતે રૂમ સાફ કરવા માટે ત્યાં પહોંચ્યો હતો. દરવાજો ખખડાવ્યા છતાં અંદરથી કોઈ પ્રતિસાદ ન મળતા તેને શંકા ગઈ હતી.

પછી હોસ્ટેલ સ્ટાફને જાણ કરવામાં આવી અને દરવાજો તોડી અંદર પ્રવેશ કરવામાં આવ્યો હતો. અંદરનો દ્રશ્ય જોઈને તમામ લોકો ચોંકી ઉઠ્યા — યુવતી પંખા સાથે દોરો બાંધીને લટકતી હાલતમાં મળી આવી હતી. ઘટનાની જાણ થતાં જ હોસ્ટેલમાં રહેલા અન્ય વિદ્યાર્થીઓમાં પણ ભય અને શોકનો માહોલ છવાઈ ગયો હતો.

પોલીસ પહોંચી, તપાસનો ધમધમાટ શરૂ

ઘટનાની જાણ થતા જ સ્થાનિક પોલીસ તાત્કાલિક ઘટનાસ્થળે પહોંચી ગઈ હતી. પોલીસે મૃતદેહને કબજે લઈને પોસ્ટમોર્ટમ માટે હોસ્પિટલ ખસેડવાની કાર્યવાહી હાથ ધરી હતી. પ્રાથમિક તપાસમાં આ આત્મહત્યાનો બનાવ હોવાનું જણાઈ રહ્યું છે, પરંતુ ચોક્કસ કારણ હજુ સુધી બહાર આવ્યું નથી.

પોલીસ દ્વારા યુવતીના મોબાઇલ ફોન, રૂમ અને અન્ય સામગ્રીની તપાસ કરવામાં આવી રહી છે જેથી આત્મહત્યા પાછળનું કારણ જાણી શકાય. આ ઉપરાંત, હોસ્ટેલના અન્ય વિદ્યાર્થીઓ અને કોલેજ સ્ટાફના નિવેદનો પણ નોંધવામાં આવી રહ્યા છે.

પરીક્ષા પૂર્ણ થયા બાદનું આકરું પગલું – કારણ અકલ્પનીય

વિદ્યાર્થિનીએ તાજેતરમાં જ પોતાની પરીક્ષા પૂર્ણ કરી હોવાનું જાણવા મળ્યું છે. પરીક્ષા પૂર્ણ થયા બાદ થોડા જ કલાકોમાં તેણે આટલું ગંભીર પગલું કેમ ભર્યું તે મુદ્દે અનેક પ્રશ્નો ઊભા થયા છે.પરિવારજનોએ જણાવ્યું કે અસ્મિતા અભ્યાસમાં સારી અને શાંત સ્વભાવની હતી, તેથી આ બનાવે તેમને પણ આઘાતમાં મૂકી દીધા છે. હાલ આ ઘટના પાછળ કોઈ વ્યક્તિગત, શૈક્ષણિક કે માનસિક દબાણ કારણભૂત હતું કે નહીં તે અંગે તપાસ ચાલુ છે.