Gujarat: ભાવનગરના કુંભારવાડા વિસ્તારમાં નારી રોડ પર આવેલી કાશ્મીરી ક્વાર્ટર એરિયામાં છેલ્લા 15-20 દિવસથી અવિરત ઊભરાતી ગટરોના કારણે સ્થાનિક લોકોના દૈનિક જીવનમાં ભારે વઘું થયું છે. ગંદા પાણી શેરીઓમાં વહેતા હોવાથી તંદુરસ્તી માટે ગંભીર ખતરો ઊભો થયો છે, તો બીજી તરફ સત્તાધીશો અને પ્રશાસન દ્વારા સમસ્યાનું નિરાકરણ લાવવામાં કોઈ રસ દર્શાવવામાં આવતો નથી. આ પરિસ્થિતિએ સ્થાનિક રહીશોમાં ભારે અસંતોષ ફેલાવ્યો છે.
Thank you for reading this post, don't forget to subscribe!આ વિસ્તારની પાયાની સમસ્યાઓ ઉકેલવા તંત્ર ક્યારે જાગશે?
કુંભારવાડા અને મોતીતળાવ વિસ્તારની પાયાની સુવિધાઓ – પાણી, ગટર અને રસ્તાઓ અંગેની સમસ્યાઓ સતત યથાવત રહે છે. અહીંના નગરસેવકો, મહાનગરપાલિકા, અને રાજ્યના પ્રતિનિધિઓ લોકકલ્યાણ માટે કેટલું પ્રયાસ કરી રહ્યા છે તે સવાલના ઘેરાવમાં છે. લોકો પ્રશ્ન કરે છે કે, “અમારી સમસ્યાઓ પ્રત્યે શાસકો અને અધિકારીઓ નિષ્ક્રિય શા માટે?” અહીંના લોકો માટે યોગ્ય સમાધાન લાવવા માટે કોઈ પગલાં લેવામાં આવતા નથી, જે વાસ્તવમાં દુખદ છે.
નારી રોડ પરની કાશ્મીરી ક્વાર્ટરમાં મહેક સ્કૂલ નજીક ગટરની સમસ્યા ગંભીર સ્વરૂપ ધારણ કરી છે. ભૂગર્ભ ડ્રેનેજ લાઇન જામ થઈ જતાં ગંદા પાણી શેરીમાં વહે છે, જેના કારણે ખાસ કરીને વૃદ્ધો, બાળકો અને સગર્ભા મહિલાઓ પર માઠી અસરો પડી રહી છે. લઘુમતી સમુદાયની બહોળી વસ્તી ધરાવતું આ વિસ્તાર હાલ રમજાન માસમાં નર્ક સમાન સ્થિતિનો સામનો કરી રહ્યું છે. લોકો મસ્જિદે જવા માટે પણ મુશ્કેલીઓ અનુભવી રહ્યા છે.
સ્થાનિક નગરસેવકો, મહાનગરપાલિકા ડ્રેનેજ વિભાગના અધિકારીઓ, મેયર અને કમિશનર સુધી અનેક વાર લેખિત અને મૌખિક રજૂઆતો કરવામાં આવી છે, છતાં આજ દિન સુધી કોઈ ઉકેલ આવ્યો નથી. ગટરના ગંદા પાણીના કારણે સ્વાસ્થ્યને જોખમ થયો છે, અને માખી-મચ્છરોનો ઉપદ્રવ અસહ્ય બની રહ્યો છે. જો તંત્ર દ્વારા તરત જ યોગ્ય કાર્યવાહી નહીં કરવામાં આવે, તો સ્થાનિક લોકો ભૂખ હડતાલ અથવા મહાનગરપાલિકાની કચેરીનો ઘેરાવ કરવાની ચીમકી આપી રહ્યા છે.
