મહેસાણા શહેર બી ડીવીઝન પોલીસ મથકના ટાસ્ક ફોર્સના સબ ઇન્સ્પેક્ટર એમ.એન. ભોળાએ ઊંઝાના એક શખ્સ સામે ફરિયાદ નોંધાવી હતી. તપાસમાં ખુલ્યું કે, મહેસાણા રાધનપુર રોડ પર આવેલી સ્ટેટ બેન્ક ઓફ ઇન્ડિયાની શાખામાં ઓક્ટોબર 2025માં ‘ઉમા સોલર’ના પ્રોપરાયટર રાજ મહેન્દ્રભાઇ પટેલના નામે ખાતું ખોલાયું હતું.
પોલીસ તપાસમાં જાણવા મળ્યું કે, ઓક્ટોબર 2025થી એપ્રિલ 2026 સુધી આ ખાતામાં રૂ. 12,15,213 જમા થયા અને રૂ. 9,46,557 ઉપાડવામાં આવ્યા હતા. સાયબર પોલીસના રેકોર્ડ અનુસાર, આ ખાતા વિરુદ્ધ દેશભરના વિવિધ રાજ્યોમાંથી કુલ 278 સાયબર ક્રાઇમની ફરિયાદો નોંધાઇ છે.
બીજી ઘટના હાઇવે રોડ પર ઓ.એન.જી.સી. વર્કશોપ નજીક આવેલી સ્ટેટ બેન્ક ઓફ ઇન્ડિયાની શાખામાં થઈ, જ્યાં ‘વેલતોરા ટેકનોલોજીસ’ નામના સંયુક્ત ખાતાનો દુરુપયોગ સામે આવ્યો. આ ખાતું નાગલપુરમાં રહેલા નીતાબેન અને મૌનીલ મોદીના નામે ચાલતું હતું. તપાસમાં એપ્રિલ 2025થી એપ્રિલ 2026 સુધી રૂ. 3,30,307 જમા થયાં હતા અને આ ખાતા વિરુદ્ધ કુલ 312 સાયબર ફ્રોડની ફરિયાદો નોંધાઈ હતી. બંને ખાતા સાથે મળીને દેશભરના નાગરિકો સાથે થયેલી છેતરપિંડીની કુલ 590 ફરિયાદો લિંક થઈ છે.
આરોપીઓએ નાગરિકોને વિશ્વાસમાં લઈ સાયબર ફ્રોડના નાણાં પોતાના લાભ માટે બેંક ખાતામાં ટ્રાન્સફર કરાવ્યાં. આ નાણાં ગુનાહિત હોવાનું જાણતા હોવા છતાં તેનો ઉપયોગ કર્યો હતો. મહેસાણા શહેર બી ડીવીઝન પોલીસે રાજકોટ તથા નાગલપુરના આરોપી રાજ પટેલ, નીતાબેન મોદી અને મૌનીલ મોદી વિરુદ્ધ ભારતીય દંડ સંહિતા 2023ની વિવિધ કલમો હેઠળ ગુનો નોંધ્યો છે અને તપાસ ચાલી રહી છે.
