બોઇંગ-787ની તમામ ફ્લાઇટ્સ પર તાત્કાલિક રોક લગાવવાની માંગ: અમદાવાદ પ્લેન ક્રેશ પછી પાયલટ સંગઠનનો સરકારને પત્ર
એર ઇન્ડિયાના બોઇંગ-787 ડ્રીમલાઇનર વિમાનોમાં છેલ્લા કેટલાક મહિનાથી સતત દેખાતી ટેકનિકલ ખામીઓને લઈને ભારતીય પાયલટ સંઘ (Federation of Indian Pilots – FIP)એ નાગરિક ઉડ્ડયન મંત્રાલયને પત્ર લખી ગંભીર ચિંતા વ્યક્ત કરી છે. સંઘે માંગ કરી છે કે તમામ બોઇંગ-787 વિમાનોની તાત્કાલિક ઉડાન બંધ કરી તેમની સંપૂર્ણ તકનીકી તપાસ કરાવવામાં આવે, કારણ કે વારંવારની ખામીઓ હવે ગંભીર ચિંતા બની રહી છે.
તાજેતરની બે મોટી ઘટનાઓ:
4 ઑક્ટોબર:
અમૃતસરથી બર્મિંગહામ જતી એર ઇન્ડિયાની ફ્લાઇટ AI-117 (બોઇંગ 787-8) લેન્ડિંગ દરમિયાન અચાનક તેનું રામ એર ટર્બાઇન (RAT) સક્રિય થઈ ગયું હતું, જેના કારણે ઓટોપાયલટ, ILS, ફ્લાઇટ ડાયરેક્ટર્સ અને કંટ્રોલ સિસ્ટમમાં ખામીઓ આવી હતી. વિમાનની ઓટોલેન્ડિંગ ક્ષમતા પણ ગુમાઈ ગઈ હતી.
9 ઑક્ટોબર:
વિયેતનામથી દિલ્હી જતી એર ઇન્ડિયાની ફ્લાઇટ AI-154ને ટેકનિકલ ખામીના કારણે દુબઈ તરફ વાળવી પડી હતી. FIPએ જણાવ્યું કે બોઇંગ-787 વિમાનોમાં આવી ખામીઓ વારંવાર આવતી હોવાથી જ DGCAએ એર ઇન્ડિયાની વિશેષ તપાસ (ઓડિટ) શરૂ કરી છે.
FIPની ત્રણ મુખ્ય માંગણીઓ:
- સઘન તપાસ: ફ્લાઇટ AI-117 અને AI-154ની બંને ઘટનાઓની સંપૂર્ણ અને નિષ્પક્ષ તપાસ હાથ ધરવામાં આવે.
- ઉડાન રોક: એર ઇન્ડિયાના તમામ બોઇંગ-787 વિમાનોને અસ્થાયી રૂપે ઉડાનથી રોકી તેમની વિદ્યુત અને ટેકનિકલ સિસ્ટમની વિગતવાર તપાસ કરવામાં આવે.
- વિશેષ ઓડિટ: DGCAના ફ્લાઇટ સ્ટાન્ડર્ડ્સ ડિરેક્ટોરેટ, એર સેફ્ટી અને એરવર્ધીનેસ વિભાગના વરિષ્ઠ અધિકારીઓ દ્વારા એર ઇન્ડિયાનો ખાસ ઓડિટ કરાવવામાં આવે, જેમાં વિમાનોની વારંવાર આવતી ખામીઓ અને *મિનિમમ ઇક્વિપમેન્ટ લિસ્ટ (MEL)*ની પ્રક્રિયાની સમીક્ષા થાય.
FIPએ વધુમાં દાવો કર્યો કે, જ્યારે વિમાનોની જાળવણી નવા એન્જિનિયરોને સોંપવામાં આવી ત્યારથી ટેકનિકલ ખામીઓમાં વધારો થયો છે.
એર ઇન્ડિયાનો જવાબ:
ટાટા ગ્રુપની માલિકીની એર ઇન્ડિયાએ 4 ઑક્ટોબરની ફ્લાઇટ AI-117માં ઇલેક્ટ્રિકલ ખામીના તમામ દાવાઓ નકારી કાઢ્યા છે.
કંપનીએ નિવેદનમાં જણાવ્યું કે RAT ખુલી જવાની ઘટના “અનકમાન્ડેડ” (બિનઆદેશિત) હતી, જે અન્ય એરલાઇન્સમાં પણ થઈ ચૂકી છે. લેન્ડિંગ સમયે RAT સક્રિય થવા છતાં, ક્રૂએ તપાસમાં તમામ ઇલેક્ટ્રિકલ અને હાઇડ્રોલિક સિસ્ટમ્સ સામાન્ય હોવાનું જણાવી સુરક્ષિત લેન્ડિંગ કર્યું હતું.
એર ઇન્ડિયાના મુજબ RAT ખુલી જવાનું કારણ ન તો ટેકનિકલ ખામી હતી, ન તો પાયલટની ભૂલ. તપાસ બાદ વિમાન ફરી સેવામાં મૂકવામાં આવ્યું અને 5 ઑક્ટોબરે તેણે બર્મિંગહામથી દિલ્હી માટે સફળ ઉડાન ભરી હતી. કંપનીએ અંતે જણાવ્યું કે મુસાફરો અને ક્રૂની સુરક્ષા હંમેશાં તેમની પ્રથમ પ્રાથમિકતા છે.
